ജി20 ഉച്ചകോടി: മോദിയെ കാണാൻ ട്രംപിന് താൽപര്യമെന്ന് യുഎസ്

ന്യൂഡൽഹി: മോദി-ട്രംപ് കൂടിക്കാഴ്ചയ്ക്ക് യുഎസ് പ്രസിഡന്റ് ഡൊണാൾഡ് ട്രംപിന് ഏറെ താൽപര്യമുണ്ടെന്ന് ഇന്ത്യയിലെ യുഎസ് അംബാസഡർ സെർജിയോ ഗോർ. പ്രധാനമന്ത്രി നരേന്ദ്ര മോദിയുമായുള്ള ട്രംപിന്റെ വ്യക്തിബന്ധവും ഇന്ത്യ-യുഎസ് ബന്ധത്തിലുണ്ടായ പുരോഗതിയും ചൂണ്ടിക്കാട്ടിയാണ് അംബാസഡർ ഇക്കാര്യം വ്യക്തമാക്കിയത്.

മോദി-ട്രംപ് കൂടിക്കാഴ്ചയ്ക്ക് സാധ്യത

ഡിസംബറിൽ ഫ്ലോറിഡയിൽ നടക്കുന്ന ജി20 ഉച്ചകോടിക്കായി മോദി അമേരിക്കയിലെത്തുമ്പോൾ സന്ദർശനം ബഹുരാഷ്ട്ര സമ്മേളനത്തിൽ മാത്രം ഒതുങ്ങില്ലെന്നാണ് പ്രതീക്ഷയെന്ന് ഗോർ പറഞ്ഞു.

ഔദ്യോഗിക ഉഭയകക്ഷി കൂടിക്കാഴ്ച ഇതുവരെ പ്രഖ്യാപിച്ചിട്ടില്ലെങ്കിലും ട്രംപിന്റെ മുൻഗണനാ പട്ടികയിൽ മോദി മുന്നിലായിരിക്കുമെന്നും അദ്ദേഹം വ്യക്തമാക്കി.

മോദി-ട്രംപ് കൂടിക്കാഴ്ച; പഴയ സൗഹൃദം ചർച്ചയിൽ

2020ലെ ഇന്ത്യാ സന്ദർശനത്തിന്റെ ഓർമകൾ ട്രംപിന് ഇപ്പോഴും ഏറെ പ്രിയപ്പെട്ടതാണെന്ന് ഗോർ പറഞ്ഞു. ഇന്ത്യയിലെ ജനങ്ങളെയും പ്രധാനമന്ത്രി മോദിയുമായുള്ള സൗഹൃദത്തെയും ട്രംപ് പലപ്പോഴും ഓർക്കാറുണ്ടെന്നും അദ്ദേഹം വ്യക്തമാക്കി.

അതേസമയം, അടുത്ത വർഷം ട്രംപ് ഇന്ത്യ സന്ദർശിക്കാനുള്ള സാധ്യതയും ഗോർ സൂചിപ്പിച്ചു. ഇരു രാജ്യങ്ങളും തമ്മിലുള്ള ബന്ധം കൂടുതൽ ശക്തമാകുമെന്ന സൂചനയാണ് ഇത് നൽകുന്നത്.

ഇന്ത്യ-യുഎസ് വ്യാപാര കരാറിലും പ്രതീക്ഷ

ഇന്ത്യയും അമേരിക്കയും തമ്മിലുള്ള നിർദിഷ്ട വ്യാപാര കരാർ യാഥാർഥ്യമാകുന്നതിലേക്ക് ഇരു രാജ്യങ്ങളും അടുത്തെത്തിയതായി ഗോർ പറഞ്ഞു.

യുഎസ് സുപ്രീംകോടതിയുടെ പുതിയ വിധിക്ക് പിന്നാലെ കരാർ സംബന്ധിച്ച ചർച്ചകൾ പുനഃക്രമീകരിച്ചുവരികയാണ്. അടുത്ത ഏതാനും മാസങ്ങൾക്കുള്ളിൽ കരാർ അന്തിമമാക്കാനാകുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.

ഇന്ത്യ-യുഎസ് വ്യാപാരം 500 ബില്യൺ ഡോളറാക്കാൻ ലക്ഷ്യം

നിലവിൽ ഇന്ത്യയും അമേരിക്കയും തമ്മിലുള്ള ഉഭയകക്ഷി വ്യാപാരം ഏകദേശം 240 ബില്യൺ ഡോളറാണ്. അടുത്ത ഏതാനും വർഷങ്ങൾക്കുള്ളിൽ ഇത് 500 ബില്യൺ ഡോളറായി ഉയർത്താനാണ് മോദിയും ട്രംപും ലക്ഷ്യമിടുന്നതെന്നും ഗോർ പറഞ്ഞു.

English Summary:
US Ambassador to India Sergio Gor said President Donald Trump is keen to meet Prime Minister Narendra Modi during the G20 Summit in Florida in December. He highlighted their personal rapport and progress in India-US relations. Ghor also said both countries are working to finalize a proposed trade deal and aim to increase bilateral trade from around $240 billion to $500 billion.