തൃശൂർ നഗരത്തിലും പരിസര പ്രദേശങ്ങളിലും വിവിധയിടങ്ങളിൽ ശക്തമായ മിന്നൽ ചുഴലി ആഞ്ഞടിച്ചു. വൻ നാശനഷ്ടങ്ങളാണ് കാറ്റിൽ പലയിടങ്ങളിലായി റിപ്പോർട്ട് ചെയ്തിരിക്കുന്നത്. പ്രധാനമായും വില്ലടം, ചേറൂർ, നട്ടത്തറ എന്നീ പ്രദേശങ്ങളിലാണ് മിന്നൽ ചുഴലി കടുത്ത നാശം വിതച്ചത്. ശക്തമായ കാറ്റിൽ ഈ പ്രദേശങ്ങളിലെ പലയിടങ്ങളിലും കൂറ്റൻ മരങ്ങൾ വേരോടെ കടപുഴകി വീഴുകയായിരുന്നു.
വില്ലടം മിൽമയ്ക്ക് മുന്നിലും വില്ലേജ് ഓഫീസിന് മുന്നിലേക്കുമാണ് മരങ്ങൾ ഒടിഞ്ഞുവീണത്. രാവിലെ സ്കൂൾ വാഹനങ്ങൾ അടക്കം നിരവധിയായ വാഹനങ്ങൾ റോഡിലൂടെ കടന്നുപോകുന്ന സമയത്തായിരുന്നു ഈ അപകടം ഉണ്ടായത്. റോഡിലേക്ക് മരം വീണതിനെത്തുടർന്ന് രണ്ട് വാഹനങ്ങൾക്ക് കാര്യമായ കേടുപാടുകൾ സംഭവിച്ചു. ഇതേത്തുടർന്ന് പ്രദേശത്ത് വലിയ രീതിയിലുള്ള ഗതാഗതക്കുരുക്കും അനുഭവപ്പെട്ടു. പിന്നീട് അധികൃതരെത്തി മണിക്കൂറുകൾക്കുള്ളിൽ തന്നെ മരങ്ങൾ മുറിച്ചുനീക്കിയാണ് റോഡിലെ ഗതാഗതം പൂർണ്ണമായും പുനസ്ഥാപിച്ചത്.
നട്ടത്തറ പൂച്ചട്ടിയിൽ പ്രവർത്തിക്കുന്ന പ്രമുഖ വിദ്യാലയമായ ഭാരതീയ വിദ്യാഭവന്റെ സ്കൂൾ മുറ്റത്തേക്കാണ് വലിയ മരങ്ങൾ കടപുഴകി വീണത്. രാവിലെ ഒൻപത് മണിയോടെയാണ് സ്കൂൾ അധികൃതരെയും വിദ്യാർത്ഥികളെയും ഭീതിയിലാഴ്ത്തിയ ഈ സംഭവം ഉണ്ടായത്.
അഞ്ചോളം വലിയ തേക്കിൻ മരങ്ങളാണ് കാറ്റിന്റെ വേഗതയിൽ ഒന്നിച്ച് ഒടിഞ്ഞുവീണത്. സ്കൂൾ മുറ്റത്ത് നിർത്തിയിട്ടിരുന്ന നാലോളം വാഹനങ്ങൾക്ക് മരം വീണ് കേടുപാടുകൾ സംഭവിച്ചിട്ടുണ്ട്. ഇതിൽ ഒരു ഒമിനി വാൻ മരം പൂർണ്ണമായി മുകളിൽ വീണ് തകർന്ന നിലയിലാണ്.
ഇതിനുപുറമേ സ്കൂളിലെ എൽ.കെ.ജി ക്ലാസുകൾ പ്രവർത്തിക്കുന്ന കെട്ടിടത്തിന്റെ മുകളിലെ മേൽക്കൂര ഷീറ്റുകൾ ശക്തമായ കാറ്റിൽ പറന്നുപോവുകയും കെട്ടിടത്തിന്റെ തൂണുകൾ തകരുകയും ചെയ്തു. കുട്ടികൾ രാവിലെ സ്കൂളിലേക്ക് എത്തിക്കൊണ്ടിരിക്കുന്ന കൃത്യമായ സമയത്തായിരുന്നു ഈ അപകടം ഉണ്ടായത്.
More Read
കുട്ടികൾ കെട്ടിടത്തിനുള്ളിലേക്ക് പ്രവേശിച്ച് തൊട്ടുപിന്നാലെയാണ് അതിശക്തമായ കാറ്റ് വീശിയടിച്ചതെന്ന് സ്കൂളിലെ അധ്യാപിക സാക്ഷ്യപ്പെടുത്തുന്നു. വലിയൊരു ദുരന്തമാണ് ഇവിടെ തലനാരിഴയ്ക്ക് ഒഴിവായത്. സ്കൂളിൽ ഉണ്ടായിരുന്ന കുട്ടികൾക്കോ അധ്യാപകർക്കോ ആർക്കും തന്നെ യാതൊരുവിധ പരിക്കുകളുമില്ലാതെ എല്ലാവരും പൂർണ്ണ സുരക്ഷിതരാണെന്ന് സ്കൂൾ അധികൃതർ അറിയിച്ചു.
English Summary
A sudden mini-tornado caused widespread destruction in Thrissur, uprooting trees in Villadam, Cheroor, and Nattathara. At Bharatiya Vidya Bhavan school in Poochatty, five teak trees fell, crushing vehicles and damaging the LKG building. A major disaster was averted as students had entered classrooms just moments before the storm hit.
