ക്രിസ്റ്റ പൈക്ക് ഗുരുതരാവസ്ഥയിൽ

നാഷ്‌വിൽ: അമേരിക്കയിലെ ടെന്നസിയിൽ വധശിക്ഷ നടപ്പാക്കുന്നതിനിടെ രണ്ട് ഡോസ് മാരക മരുന്ന് നൽകിയിട്ടും മരണം സംഭവിക്കാതിരുന്ന ക്രിസ്റ്റ പൈക്ക് (50) ഗുരുതരാവസ്ഥയിൽ. വധശിക്ഷാ ശ്രമം പരാജയപ്പെട്ടതിനെ തുടർന്ന് നാഷ്‌വില്ലിലെ റിവർബെൻഡ് മാക്സിമം സെക്യൂരിറ്റി ഇൻസ്റ്റിറ്റ്യൂഷനിൽനിന്ന് പൈക്കിനെ ആശുപത്രിയിലേക്ക് മാറ്റുകയായിരുന്നു. അഭിഭാഷകർ വ്യാഴാഴ്ച അവർ ഗുരുതരാവസ്ഥയിലാണെന്നും ജീവൻ രക്ഷിക്കാനുള്ള ചികിത്സ ലഭിക്കുന്നുണ്ടെന്നും അറിയിച്ചു.

വധശിക്ഷയ്ക്കായി പെന്റോബാർബിറ്റലിന്റെ രണ്ട് ഡോസുകൾ നൽകിയെങ്കിലും പൈക്ക് ശ്വസിച്ചുകൊണ്ടിരുന്നതായി അഭിഭാഷകരും മാധ്യമസാക്ഷികളും അറിയിച്ചു. തുടർന്ന് നടപടികൾ നിർത്തിവച്ച് അടിയന്തര വൈദ്യസഹായം നൽകുകയായിരുന്നു.

ഒരു മണിക്കൂറോളം ഐവി ലൈൻ സ്ഥാപിക്കാൻ ശ്രമം

വധശിക്ഷാ നടപടിക്കിടെ പൈക്കിന്റെ ഇടത് കൈയിൽ നിരവധി തവണ സൂചി കുത്തിയെന്നാണ് അഭിഭാഷകൻ റാൻഡി സ്പൈവിയുടെ വിശദീകരണം. ഒരു മണിക്കൂറോളം ഐവി ലൈൻ സ്ഥാപിക്കാൻ ശ്രമിച്ചെന്നും കുറഞ്ഞത് ഏഴ് സൂചികൾ ഉപയോഗിച്ചതായി അദ്ദേഹം പറഞ്ഞതായും റിപ്പോർട്ടുകളുണ്ട്. ഒരു സൂചി വളഞ്ഞ നിലയിൽ പുറത്തെടുത്തതായും അഭിഭാഷകൻ വ്യക്തമാക്കി.

മരുന്നിന്റെ രണ്ട് ഡോസുകൾ നൽകിയ ശേഷവും പൈക്ക് ശ്വസിക്കുകയും കൂർക്കംവലിക്കുകയും ചെയ്തതായി വധശിക്ഷയ്ക്ക് സാക്ഷിയായ മാധ്യമപ്രവർത്തകർ റിപ്പോർട്ട് ചെയ്തു. പിന്നീട് അടിയന്തര വൈദ്യസഹായത്തിനായി ആശുപത്രിയിലേക്ക് മാറ്റുകയായിരുന്നു.

അതേസമയം, ടെന്നസി ഡിപ്പാർട്ട്മെന്റ് ഓഫ് കൊറക്ഷൻസ് സംസ്ഥാനത്തിന്റെ അംഗീകൃത വധശിക്ഷാ പ്രോട്ടോക്കോൾ എല്ലാ ഘട്ടത്തിലും പാലിച്ചെന്നാണ് വ്യക്തമാക്കിയത്. പൈക്കിനെ ഓഫ്-സൈറ്റ് മെഡിക്കൽ കേന്ദ്രത്തിലേക്ക് മാറ്റിയതായും വകുപ്പ് അറിയിച്ചു.

ടെന്നസിയിൽ വധശിക്ഷകൾ താൽക്കാലികമായി നിർത്തി

സംഭവത്തിന് പിന്നാലെ ടെന്നസി ഗവർണർ ബിൽ ലീ 2026ലെ ശേഷിക്കുന്ന എല്ലാ വധശിക്ഷകളും താൽക്കാലികമായി നിർത്തിവച്ചു. സംഭവത്തിൽ സമഗ്രമായ സ്വതന്ത്ര മൂന്നാംകക്ഷി അന്വേഷണം നടത്താനും അദ്ദേഹം ഉത്തരവിട്ടു.

സംഭവത്തിൽ കൃത്യമായി എന്താണ് സംഭവിച്ചതെന്ന് കണ്ടെത്തുന്നതിനാണ് അന്വേഷണം. ടെന്നസിയിൽ ഈ വർഷം വധശിക്ഷാ നടപടിയുമായി ബന്ധപ്പെട്ട് റിപ്പോർട്ട് ചെയ്യപ്പെടുന്ന രണ്ടാമത്തെ പരാജയമാണിതെന്നും റിപ്പോർട്ടുകളുണ്ട്.

1995ലെ കൊലക്കേസിൽ വധശിക്ഷ

1995ൽ സഹപാഠിയായ കോളിൻ സ്ലെമ്മറെ കൊലപ്പെടുത്തിയ കേസിലാണ് ക്രിസ്റ്റ പൈക്കിന് വധശിക്ഷ വിധിച്ചത്. അന്ന് 18 വയസ്സായിരുന്നു പൈക്കിന്. 19കാരിയായ സ്ലെമ്മറെ കൊലപ്പെടുത്തിയ കേസിൽ പൈക്കും അന്നത്തെ കാമുകനായ ടാഡാരിൽ ഷിപ്പും പ്രതികളായിരുന്നു.

2026 സെപ്റ്റംബർ 30നായിരുന്നു പൈക്കിന്റെ വധശിക്ഷ നടപ്പാക്കാൻ നിശ്ചയിച്ചിരുന്നത്. ടെന്നസിയിൽ രണ്ട് നൂറ്റാണ്ടിലേറെയ്ക്ക് ശേഷം വധശിക്ഷ നേരിടുന്ന ആദ്യ വനിതയായിരുന്നു പൈക്ക്. ഗവർണർ ബിൽ ലീ നേരത്തെ അവരുടെ ദയാഹർജി തള്ളിയിരുന്നു.

പൈക്കിന്റെ ശിക്ഷ ജീവപര്യന്തമാക്കി ഇളവ് ചെയ്യണമെന്നാവശ്യപ്പെട്ട് അഭിഭാഷകർ രംഗത്തെത്തിയിട്ടുണ്ട്. അതേസമയം, പരാജയപ്പെട്ട വധശിക്ഷാ നടപടിയെക്കുറിച്ചുള്ള അന്വേഷണം പൂർത്തിയാകുന്നതുവരെ സംസ്ഥാനത്തെ മറ്റ് വധശിക്ഷകൾ നിർത്തിവച്ചിരിക്കുകയാണ്.

English Summary

Christa Pike, 50, remains in critical condition after Tennessee’s attempt to execute her by lethal injection failed. According to her attorneys, two doses of pentobarbital were administered, but she continued breathing and was later taken to a hospital for emergency medical care. Tennessee Governor Bill Lee has suspended the state’s remaining executions for 2026 and ordered an independent review of the incident.