ചെന്നൈ: പണം തട്ടിയെടുക്കാനായി യുവാവിനെ തട്ടിക്കൊണ്ടുപോയ സംഘം, കൈയിൽ പണമില്ലെന്ന് അറിഞ്ഞതോടെ മൊബൈൽ ആപ്പ് വഴി വായ്പയെടുപ്പിച്ച് കവർച്ച നടത്തി. ചെന്നൈയിലെ പള്ളിക്കരണൈയിൽ ബുധനാഴ്ചയാണ് സംഭവം. യുവാവിനെ മർദിച്ച് ₹9,500 വായ്പയെടുപ്പിച്ച ശേഷം എടിഎമ്മിൽനിന്ന് പണം പിൻവലിച്ച് കടന്നുകളഞ്ഞ നാലംഗ സംഘത്തെ പൊലീസ് അറസ്റ്റ് ചെയ്തു.
ഓട്ടോറിക്ഷയിൽ തട്ടിക്കൊണ്ടുപോയി മർദിച്ചു
അജയ് എന്ന 21കാരനാണ് കവർച്ചയ്ക്കിരയായത്. നാലുപേരടങ്ങുന്ന സംഘം അജയിനെ ഓട്ടോറിക്ഷയിൽ തട്ടിക്കൊണ്ടുപോയി പണം ആവശ്യപ്പെട്ട് മർദിക്കുകയായിരുന്നു. എന്നാൽ യുവാവിന്റെ കൈവശം പണമില്ലെന്ന് വ്യക്തമായതോടെ സംഘം മറ്റൊരു മാർഗം സ്വീകരിച്ചു.
മൊബൈൽ ആപ്പ് വഴി ₹9,500 വായ്പ
അജയിന്റെ ഫോണിലെ ലോൺ ആപ്പ് ഉപയോഗിച്ച് വായ്പയ്ക്ക് അപേക്ഷ നൽകാൻ സംഘം നിർബന്ധിച്ചു. ₹9,500 വായ്പ ലഭിച്ചതോടെ യുവാവിനെ അടുത്തുള്ള എടിഎമ്മിലെത്തിച്ച് പണം പിൻവലിപ്പിച്ചു. തുടർന്ന് പണവുമായി സംഘം കടന്നുകളയുകയായിരുന്നു.
ഇതിനുപുറമേ, അജയിന്റെ മൊബൈൽ ഫോണും പ്രതികൾ കവർന്നെടുത്തതായി റിപ്പോർട്ടിൽ പറയുന്നു.
നാലംഗ സംഘം അറസ്റ്റിൽ
സംഭവവുമായി ബന്ധപ്പെട്ട് സായി അബുതാകിർ എന്ന അബു (18), പ്രകാശ് രാജ് (22), പൂബാലൻ (23), സഞ്ജയ് (21) എന്നിവരെ പൊലീസ് അറസ്റ്റ് ചെയ്തു. കവർച്ചയ്ക്കുപയോഗിച്ച ഓട്ടോറിക്ഷയും പിടിച്ചെടുത്തു.
അറസ്റ്റിലായ പ്രതികളെ ജുഡീഷ്യൽ കസ്റ്റഡിയിൽ വിട്ടതായി പൊലീസ് അറിയിച്ചു.
English Summary: Four men were arrested in Chennai’s Pallikaranai after allegedly abducting and assaulting a 21-year-old man, forcing him to obtain a ₹9,500 loan through a mobile app, and withdrawing the money from an ATM. Police also seized the auto-rickshaw allegedly used in the crime.
