പത്തനംതിട്ട: മോഹൻലാൽ നായകനാകുന്ന അതിമനോഹരം സിനിമയുടെ ശബരിമല സന്നിധാനത്തെയും പരിസര പ്രദേശങ്ങളെയും ഉൾപ്പെടുത്തിയുള്ള ചിത്രീകരണത്തിന് അനുമതി നിഷേധിച്ച് വനംവകുപ്പ്. ഹൈക്കോടതിയുടെ ഏറ്റവും പുതിയ ഉത്തരവ് ചൂണ്ടിക്കാട്ടിയാണ് നടപടി. ക്ഷേത്രം ഉൾപ്പെടുന്ന പ്രദേശങ്ങൾ പെരിയാർ കടുവ സങ്കേതത്തിന് കീഴിലായതിനാലാണ് അനുമതി നിഷേധിച്ചത്.
അതിമനോഹരം സിനിമയ്ക്ക് ശബരിമലയിൽ തിരിച്ചടി
തരുൺ മൂർത്തി സംവിധാനം ചെയ്യുന്ന അതിമനോഹരം സിനിമയുടെ പ്രധാന രംഗങ്ങൾ ശബരിമല സന്നിധാനത്ത് ചിത്രീകരിക്കാനായിരുന്നു അണിയറപ്രവർത്തകരുടെ പദ്ധതി. പമ്പ മുതൽ സന്നിധാനം വരെയുള്ള പ്രദേശങ്ങളിൽ ചിത്രീകരണത്തിന് തിരുവിതാംകൂർ ദേവസ്വം ബോർഡ് നേരത്തെ അനുമതി നൽകിയിരുന്നു.
ശബരിമലയെയോ മതവിശ്വാസങ്ങളെയോ മോശമായി ചിത്രീകരിക്കരുതെന്ന കർശന നിർദേശങ്ങളോടെയായിരുന്നു ദേവസ്വം ബോർഡിന്റെ അനുമതി. എന്നാൽ പെരിയാർ കടുവ സങ്കേതത്തിലെ നിയന്ത്രണങ്ങൾ ചൂണ്ടിക്കാട്ടി വനംവകുപ്പ് ഈ നീക്കം തടയുകയായിരുന്നു.
ഹൈക്കോടതി ഉത്തരവ് ചൂണ്ടിക്കാട്ടി വനംവകുപ്പ്
ശബരിമല ക്ഷേത്രം ഉൾപ്പെടുന്ന പ്രദേശങ്ങൾ പെരിയാർ ടൈഗർ റിസർവിന്റെ പരിധിയിലായതിനാൽ ചിത്രീകരണത്തിന് പ്രത്യേക നിയന്ത്രണങ്ങളുണ്ട്. ഏറ്റവും പുതിയ ഹൈക്കോടതി ഉത്തരവിന്റെ അടിസ്ഥാനത്തിലാണ് വനംവകുപ്പ് അനുമതി നിഷേധിച്ചത്.
അതേസമയം, വിഷയത്തിൽ ഇടപെടാൻ ഹൈക്കോടതിയും തയ്യാറായിട്ടില്ലെന്നാണ് വിവരം. ഇതോടെ സന്നിധാനത്തെ പ്രധാന ചിത്രീകരണ രംഗങ്ങൾ ഒഴിവാക്കേണ്ട സാഹചര്യമാണുള്ളത്.
More Read
പമ്പ വരെയുള്ള പ്രദേശത്ത് ഷൂട്ടിംഗ് തുടരും
അതേസമയം, പമ്പ വരെയുള്ള റാന്നി വനംവകുപ്പ് ഡിവിഷന്റെ പരിധിയിൽ ചിത്രീകരണത്തിന് അനുമതി ലഭിച്ചിട്ടുണ്ട്. ഈ പ്രദേശങ്ങളിൽ നാളെ തന്നെ ഷൂട്ടിംഗ് ആരംഭിക്കുമെന്നാണ് ലഭിക്കുന്ന വിവരം.
ചിത്രത്തിൽ ‘ലൗലജൻ’ എന്ന പൊലീസ് ഉദ്യോഗസ്ഥന്റെ കഥാപാത്രത്തെയാണ് മോഹൻലാൽ അവതരിപ്പിക്കുന്നത്. നീണ്ട ഇടവേളയ്ക്ക് ശേഷം മീര ജാസ്മിൻ മോഹൻലാലിന്റെ നായികയായി എത്തുന്നു എന്ന പ്രത്യേകതയും ചിത്രത്തിനുണ്ട്.
വൻ താരനിര; 80 ശതമാനം ചിത്രീകരണം പൂർത്തിയായി
മുകേഷ്, ജഗദീഷ്, മനോജ് കെ. ജയൻ, ഇർഷാദ്, വിഷ്ണു ജി. വാര്യർ, പ്രമോദ് വെളിയനാട് തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നു. രതീഷ് രവിയാണ് തിരക്കഥ ഒരുക്കിയത്.
ആഷിഖ് ഉസ്മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്മാൻ നിർമ്മിക്കുന്ന ചിത്രത്തിന്റെ 80 ശതമാനത്തോളം ചിത്രീകരണം ഇതിനകം പൂർത്തിയായിട്ടുണ്ട്. ഡിസംബർ 24ന് ചിത്രം തിയേറ്ററുകളിലെത്തിക്കാനാണ് നിർമ്മാതാക്കളുടെ തീരുമാനം.
