വിദ്യാർത്ഥികൾക്കായി കെഎസ്ആർടിസിയുടെ ‘വിജ്ഞാന ദർശിനി’; കുറഞ്ഞ ചെലവിൽ പഠനയാത്ര

തിരുവനന്തപുരം: വിദ്യാർത്ഥികൾക്ക് കുറഞ്ഞ ചെലവിൽ വിനോദത്തോടൊപ്പം അറിവും പകരാൻ പുതിയ യാത്രാ പാക്കേജുമായി കെഎസ്ആർടിസി. ബജറ്റ് ടൂറിസം സെല്ലിന്റെ നേതൃത്വത്തിൽ ‘വിജ്ഞാന ദർശിനി’ എന്ന പേരിലാണ് പദ്ധതി ആരംഭിക്കുന്നത്. സാംസ്‌കാരിക കേന്ദ്രങ്ങൾ, പുരാവസ്തു കേന്ദ്രങ്ങൾ, വ്യവസായശാലകൾ, വിനോദസഞ്ചാര കേന്ദ്രങ്ങൾ എന്നിവ സന്ദർശിക്കുന്നതിലൂടെ വിദ്യാർത്ഥികൾക്ക് പാഠപുസ്തകങ്ങൾക്ക് പുറത്തുള്ള പ്രായോഗിക അറിവ് നേടാനാകും.

കെഎസ്ആർടിസി വിജ്ഞാന ദർശിനിയിൽ ഉൾപ്പെടുന്ന സ്ഥലങ്ങൾ

ആദ്യഘട്ടത്തിൽ തിരുവനന്തപുരം ജില്ലയിലെയും സമീപ പ്രദേശങ്ങളിലെയും പ്രധാന കേന്ദ്രങ്ങൾ ഉൾപ്പെടുത്തിയാണ് യാത്രകൾ ആസൂത്രണം ചെയ്തിരിക്കുന്നത്. പൊന്മുടി, കാപ്പുകാട് ആന വളർത്തൽ കേന്ദ്രം, നെയ്യാർ ഡാം, പാലോട് ബൊട്ടാണിക്കൽ ഗാർഡൻ, വിതുര ജേഴ്സി ഫാം എന്നിവയാണ് പ്രധാന ആകർഷണങ്ങൾ.

ഇതിനുപുറമേ മ്യൂസിയം, പ്ലാനറ്റേറിയം തുടങ്ങിയ വിജ്ഞാനകേന്ദ്രങ്ങളും യാത്രാപട്ടികയിൽ ഉൾപ്പെടുത്തിയിട്ടുണ്ട്. വിനോദയാത്രയ്ക്കൊപ്പം പ്രകൃതി, ശാസ്ത്രം, ചരിത്രം, മൃഗസംരക്ഷണം തുടങ്ങിയ മേഖലകളെക്കുറിച്ച് നേരിട്ട് മനസ്സിലാക്കാനും വിദ്യാർത്ഥികൾക്ക് അവസരമൊരുക്കുകയാണ് പദ്ധതിയുടെ ലക്ഷ്യം.

വിദ്യാഭ്യാസ സ്ഥാപനങ്ങളുടെ ആവശ്യത്തിന് പഠനയാത്രകൾ

വിദ്യാഭ്യാസ സ്ഥാപനങ്ങളുടെ ആവശ്യാനുസരണം വ്യവസായശാലകളിലേക്കുള്ള പഠനയാത്രകളും കെഎസ്ആർടിസി ഒരുക്കും. വിദ്യാർത്ഥികളുടെ പഠനവിഷയങ്ങളുമായി ബന്ധമുള്ള സ്ഥാപനങ്ങളും കേന്ദ്രങ്ങളും സന്ദർശിക്കുന്ന രീതിയിൽ യാത്രകൾ ക്രമീകരിക്കാനാകും.

പൊന്മുടി യാത്രയ്ക്കായി അനുയോജ്യമായ പ്രത്യേക ബസുകളാണ് ഉപയോഗിക്കുന്നത്. ഒരു ബസിൽ 36 വിദ്യാർത്ഥികൾക്ക് യാത്ര ചെയ്യാനാകും. പദ്ധതി മറ്റ് ജില്ലകളിലേക്കും ഉടൻ വ്യാപിപ്പിക്കുമെന്ന് അധികൃതർ അറിയിച്ചിട്ടുണ്ട്.

ബുക്കിംഗിനും വിവരങ്ങൾക്കും ജില്ലാ കോ-ഓർഡിനേറ്റർമാർ

കെഎസ്ആർടിസി വിജ്ഞാന ദർശിനി യാത്രകളെക്കുറിച്ചുള്ള കൂടുതൽ വിവരങ്ങൾക്കും ബുക്കിംഗിനും ബജറ്റ് ടൂറിസം സെല്ലിന്റെ ജില്ലാ കോ-ഓർഡിനേറ്റർമാരുമായി ബന്ധപ്പെടാം.

ജില്ല തിരിച്ചുള്ള ഫോൺ നമ്പറുകൾ

• തിരുവനന്തപുരം നോർത്ത്: 9188619378
• തിരുവനന്തപുരം സൗത്ത്: 9188938522
• കൊല്ലം: 9188938523
• പത്തനംതിട്ട: 9188938524
• ആലപ്പുഴ: 9188938525
• കോട്ടയം: 9188938526
• ഇടുക്കി: 9188938527
• എറണാകുളം: 9188938528
• തൃശൂർ: 9188938529
• പാലക്കാട്: 9188938530
• മലപ്പുറം: 9188938531
• കോഴിക്കോട്: 9188938532
• വയനാട്: 9188938533
• കണ്ണൂർ, കാസർകോട്: 9188938534

English Summary:

KSRTC’s Budget Tourism Cell is introducing ‘Vijnana Darshini’, a study-tour package designed to offer students affordable educational trips. Initial destinations include Ponmudi, Kappukad Elephant Rehabilitation Centre, Neyyar Dam, Palode Botanical Garden, Vithura Jersey Farm, museums and planetariums. Educational institutions can also request visits to industrial facilities. A special bus for Ponmudi trips can accommodate 36 students. For bookings, institutions can contact their district Budget Tourism Cell coordinators