അഹമ്മദാബാദ്: ഗുജറാത്തിലെ അമ്രേലി ജില്ലയിൽ ഗുഡ്സ് ട്രെയിനിടിച്ച് സിംഹത്തിന് ഗുരുതരമായി പരുക്കേറ്റു. ദാംനഗറിനും ലിലിയയ്ക്കും ഇടയിലുള്ള റെയിൽവേ പാതയിൽ ഇംഗോരാള ഗ്രാമത്തിനു സമീപമാണ് അപകടം. കൃഷിയിടങ്ങളിലേക്ക് ഓടിമറഞ്ഞ സിംഹത്തെ കണ്ടെത്തി അടിയന്തര ചികിത്സ നൽകാനുള്ള ശ്രമങ്ങൾ വനംവകുപ്പ് ഊർജിതമാക്കി.
രണ്ട് സിംഹങ്ങൾ ട്രാക്ക് മുറിച്ചുകടക്കുന്നതിനിടെ അപകടം
രണ്ട് സിംഹങ്ങൾ റെയിൽവേ ട്രാക്ക് മുറിച്ചുകടക്കുന്നതിനിടെയാണ് അപകടമുണ്ടായത്. പിപാവവ് തുറമുഖത്തുനിന്ന് ധാസയിലേക്ക് മണിക്കൂറിൽ 60–70 കിലോമീറ്റർ വേഗത്തിൽ സഞ്ചരിച്ചിരുന്ന ചരക്ക് ട്രെയിനാണ് സിംഹത്തെ ഇടിച്ചത്.
അപകടത്തിനുശേഷം സിംഹത്തിന്റെ വാലിന്റെ ഒരു ഭാഗം അറ്റുപോയ നിലയിൽ ട്രാക്കിൽ കണ്ടെത്തി. ഇതോടെ പരുക്കേറ്റ മൃഗത്തെ കണ്ടെത്താനുള്ള ശ്രമങ്ങൾ അധികൃതർ ശക്തമാക്കി.
രക്തക്കറകളും കാൽപ്പാടുകളും പിന്തുടർന്ന് പരിശോധന
More Read
റെയിൽവേ അധികൃതർ വിവരം അറിയിച്ചതിനെത്തുടർന്ന് വനംവകുപ്പിന്റെ പ്രത്യേക സംഘം സ്ഥലത്തെത്തി പരിശോധന നടത്തി. ട്രാക്കിൽ പരിശോധന നടത്തുന്നതിനായി ട്രെയിൻ നിർത്തിയിട്ടു. തുടർന്നുള്ള തിരച്ചിലിലാണ് സിംഹത്തിന്റെ വാലിന്റെ അറ്റുപോയ ഭാഗം വനപാലകർ കണ്ടെത്തിയത്.
തുടർന്ന് അപകടസ്ഥലത്തെ രക്തക്കറകളും കാൽപ്പാടുകളും പിന്തുടർന്ന് നടത്തിയ പരിശോധനയിൽ പരുക്കേറ്റ സിംഹം സമീപത്തെ കൃഷിയിടങ്ങളിലേക്ക് ഓടിമറഞ്ഞതായി വനംവകുപ്പ് സ്ഥിരീകരിച്ചു.
ട്രാക്കിങ് ഉപകരണങ്ങളുടെ സഹായത്തോടെ തിരച്ചിൽ
More Read
സിംഹത്തെ കണ്ടെത്തുന്നതിനായി ആധുനിക ട്രാക്കിങ് ഉപകരണങ്ങളുടെ സഹായത്തോടെ സമീപത്തെ കാടുകളിലും കൃഷിയിടങ്ങളിലും തിരച്ചിൽ തുടരുകയാണ്. മൃഗത്തെ കണ്ടെത്തി അടിയന്തര വെറ്ററിനറി ചികിത്സ നൽകുകയാണ് വനംവകുപ്പിന്റെ പ്രധാന ലക്ഷ്യം.
അതേസമയം, പ്രദേശത്ത് സിംഹത്തിന്റെ സാന്നിധ്യമുള്ളതിനാൽ ഗ്രാമീണർക്കും കർഷകർക്കും അധികൃതർ ജാഗ്രതാനിർദേശം നൽകിയിട്ടുണ്ട്. തിരച്ചിൽ പൂർത്തിയാക്കി സിംഹത്തിന് ആവശ്യമായ ചികിത്സ ലഭ്യമാക്കാനുള്ള നടപടികളാണ് വനംവകുപ്പ് സ്വീകരിക്കുന്നത്.
English Summary:
A lion was seriously injured after being hit by a goods train near Ingorala village in Gujarat’s Amreli district, between Damnagar and Liliya. The incident occurred as two lions were crossing the railway tracks. The train was travelling from Pipavav Port towards Dhola at an estimated speed of 60–70 km/h. Forest officials found part of the lion’s severed tail on the tracks and followed bloodstains and footprints to determine that the injured animal had fled into nearby agricultural fields. Search operations are continuing with tracking equipment to locate the lion and provide emergency veterinary treatment. Authorities have also advised local villagers and farmers to remain alert.
