തിരുവനന്തപുരം: കോവളം സ്‌പാ കേസിൽ അന്വേഷണം വ്യാപിപ്പിച്ച് പ്രത്യേക അന്വേഷണ സംഘം ഇന്ന് ആന്ധ്രാപ്രദേശിലേക്ക് തിരിക്കും. കേസിലെ ഇരയായ 16കാരി പഠിച്ച സ്കൂളിൽ തെളിവെടുക്കുകയും സഹോദരിയുടെ മൊഴി രേഖപ്പെടുത്തുകയും ചെയ്യും.
അന്തർസംസ്ഥാന ബന്ധം കണ്ടെത്തിയതിനെ തുടർന്ന് അന്വേഷണ ഉദ്യോഗസ്ഥനെയും മാറ്റിയിട്ടുണ്ട്. കൺട്രോൾ റൂം എസിപി സി. ചന്ദ്രകുമാറിനാണ് പുതിയ അന്വേഷണ ചുമതല.
ആന്ധ്രയിൽ തെളിവെടുപ്പിനൊരുങ്ങി പൊലീസ്
ആന്ധ്ര സ്വദേശിയായ പെൺകുട്ടിയെ എങ്ങനെയാണ് തിരുവനന്തപുരത്തെ സ്‌പാകളിൽ എത്തിച്ചതെന്നും ഇതിന് പിന്നിൽ ഇടനിലക്കാരായി പ്രവർത്തിച്ചത് ആരൊക്കെയാണെന്നും പൊലീസ് അന്വേഷിക്കും. കേസിൽ അറസ്റ്റിലായ അഞ്ചുപേരെ കേന്ദ്രീകരിച്ചാണ് അന്വേഷണം പുരോഗമിക്കുന്നത്.
അന്തർസംസ്ഥാന ബന്ധം വ്യക്തമായതോടെയാണ് മുതിർന്ന ഉദ്യോഗസ്ഥനെ അന്വേഷണ ചുമതല ഏൽപ്പിച്ചത്. ചെന്നൈയിലും കേരളത്തിലും പെൺകുട്ടിയെ എത്തിച്ചതിന് പിന്നിൽ വലിയ റാക്കറ്റുണ്ടോയെന്നും പൊലീസ് പരിശോധിക്കുന്നുണ്ട്.
ഫോൺ വിവരങ്ങളും പണമിടപാടുകളും പരിശോധിക്കുന്നു
സ്‌പായുടെ യഥാർഥ ഉടമയായ ജൂനിയർ ഹെൽത്ത് ഇൻസ്‌പെക്ടർ എം. ഒ. അനുരൂപ്, രണ്ട് സ്‌പാ ജീവനക്കാർ, പെൺകുട്ടിയെ എത്തിച്ച ദമ്പതികൾ എന്നിവരുടെ വിവരങ്ങൾ പൊലീസ് ശേഖരിക്കുന്നുണ്ട്. ഇവരുടെ പണമിടപാടുകളും അന്വേഷണത്തിന്റെ ഭാഗമായി പരിശോധിച്ചു.
More Read
കടുത്ത ആരോഗ്യപ്രശ്നങ്ങൾ ഉണ്ടായപ്പോഴും പെൺകുട്ടിയെ പലർക്കും കാഴ്ചവെച്ചെന്നാണ് പൊലീസിന് ലഭിച്ച വിവരം. കുട്ടിയെ വീണ്ടും വൈദ്യപരിശോധനയ്ക്ക് വിധേയയാക്കി.
നിലവിൽ ശിശുക്ഷേമ സമിതിയുടെ (സിഡബ്ല്യുസി) സംരക്ഷണയിലുള്ള പെൺകുട്ടിയെ ഐജി നേരിട്ടുകണ്ട് വിവരങ്ങൾ ശേഖരിക്കുകയും ചെയ്തു.
ചെന്നൈയിലേക്ക് കൊണ്ടുപോകുന്നതിൽ അനിശ്ചിതത്വം
പെൺകുട്ടിയെ ചെന്നൈയിലെ ചെങ്കൽപ്പെട്ടിൽ ഏത് സ്‌പായിലാണ് വിറ്റതെന്ന് ഇതുവരെ കണ്ടെത്താനായിട്ടില്ല. ഇതുമായി ബന്ധപ്പെട്ട് തെളിവെടുപ്പിനായി പെൺകുട്ടിയെ ചെന്നൈയിലെത്തിക്കാൻ താംബരം പൊലീസ് അനുമതി തേടിയിട്ടുണ്ട്.
More Read
എന്നാൽ തുടർച്ചയായ മൊഴിയെടുപ്പും തെളിവെടുപ്പും കഴിഞ്ഞ സാഹചര്യത്തിൽ കുട്ടിയെ ഉടൻ ചെന്നൈയിലേക്ക് കൊണ്ടുപോകാൻ സിഡബ്ല്യുസി അനുമതി നൽകിയേക്കില്ലെന്നാണ് വിവരം. കേസിലെ അന്തർസംസ്ഥാന ബന്ധം കണക്കിലെടുത്ത് അന്വേഷണസംഘത്തെയും വിപുലീകരിച്ചിട്ടുണ്ട്.
English Summary :The special investigation team probing the Kovalam spa case will travel to Andhra Pradesh to gather evidence at the 16-year-old victim’s school and record her sister’s statement. Control Room ACP C. Chandrakumar has been appointed as the new investigating officer following indications of interstate links. Police are examining phone records and financial transactions of the accused and investigating how the girl was brought to spas in Kerala and Chennai.
