കാർബൺ ന്യൂട്രൽ വീട്: കോഴിക്കോട്ടെ ‘മേട’ പരിസ്ഥിതി സൗഹൃദ ജീവിതത്തിന്റെ മാതൃക

കോഴിക്കോട്: പരിസ്ഥിതിക്ക് ദോഷം വരുത്താതെ ജീവിക്കാനാകുമെന്ന് സ്വന്തം വീടിലൂടെ തെളിയിക്കുകയാണ് വേങ്ങേരി സ്വദേശി ബാബു പറമ്പത്ത്.

രാജ്യത്തെ ആദ്യ കാർബൺ ന്യൂട്രൽ വീടായി വിശേഷിപ്പിക്കപ്പെടുന്ന ‘മേട’ ഇപ്പോൾ കാർബൺ ന്യൂട്രൽ പരിധിയും കടന്ന് കാർബൺ നെഗറ്റീവ് നിലയിലെത്തിയതായി പഠനം വ്യക്തമാക്കുന്നു.

സൗരോർജം, ജൈവകൃഷി, മാലിന്യസംസ്കരണം എന്നിവ സമന്വയിപ്പിച്ചാണ് ഈ നേട്ടം.

കാർബൺ ന്യൂട്രൽ വീട്; പഠനം നടത്തി ശാസ്ത്രജ്ഞർ

കാർബൺ പുറന്തള്ളൽ കുറയ്ക്കുന്നതിനൊപ്പം അന്തരീക്ഷത്തിൽനിന്ന് കാർബൺ വലിച്ചെടുക്കാനും കഴിയുന്ന രീതിയിലാണ് ‘മേട’ ഒരുക്കിയിരിക്കുന്നത്.

സെന്റർ ഫോർ വാട്ടർ റിസോഴ്‌സ് മാനേജ്‌മെന്റിലെ ശാസ്ത്രജ്ഞരാണ് വീടിനെക്കുറിച്ച് പഠനം നടത്തിയത്.

കാർബൺ ന്യൂട്രൽ ജീവിതശൈലി സ്വന്തം വീട്ടിൽ പ്രാവർത്തികമാക്കിയ ബാബു പറമ്പത്ത്, കൂടുതൽ വീടുകളിലേക്ക് ഈ മാതൃക വ്യാപിപ്പിക്കാനാണ് ലക്ഷ്യമിടുന്നത്.

സോളാർ വൈദ്യുതിയിലൂടെ വരുമാനം

12 സെന്റ് സ്ഥലത്ത് 2009ലാണ് ബാബു വീടിന്റെ നിർമാണം ആരംഭിച്ചത്. കാർബൺ ആഗിരണം വർധിപ്പിക്കുന്നതിനായി പരമാവധി ചെടികൾ നട്ടുപിടിപ്പിക്കുകയും വൈദ്യുതി ആവശ്യങ്ങൾക്കായി സൗരോർജ സംവിധാനം സ്ഥാപിക്കുകയും ചെയ്തു.

വീട്ടിൽ ഉൽപ്പാദിപ്പിക്കുന്ന അധിക വൈദ്യുതി ഗ്രിഡിലേക്ക് നൽകുന്നതിലൂടെ പ്രതിവർഷം ഏകദേശം 8,000 രൂപ വരുമാനം ലഭിക്കുന്നുണ്ടെന്ന് ബാബു പറയുന്നു.

കരിയിലയിൽനിന്ന് ജൈവവളം; കൃഷിയിലൂടെ നേട്ടം

വീട്ടിലെ കരിയിലകൾ ശേഖരിച്ച് കമ്പോസ്റ്റ് തയ്യാറാക്കുകയാണ് മറ്റൊരു പ്രധാന പ്രവർത്തനം. ഈ ജൈവവളം കൃഷിക്ക് ഉപയോഗിക്കുന്നതിലൂടെ പ്രതിവർഷം ഏകദേശം ഒരു ലക്ഷം രൂപയുടെ നേട്ടമുണ്ടാകുന്നുവെന്നും ബാബു വ്യക്തമാക്കുന്നു.

ഉള്ളി, ഉരുളക്കിഴങ്ങ് എന്നിവ ഒഴികെയുള്ള മിക്ക പച്ചക്കറികളും വീട്ടിൽതന്നെ കൃഷി ചെയ്യുന്നുണ്ട്. ഇതിലൂടെ പുറത്തുനിന്നുള്ള പച്ചക്കറി വാങ്ങൽ കുറയ്ക്കാനും കഴിയുന്നു.

പകൽ വൈദ്യുതി ഉപയോഗിക്കാതെ പ്രകൃതിദത്ത വെളിച്ചം

പകൽസമയത്ത് വൈദ്യുതി ഉപയോഗിക്കുന്നത് പരമാവധി ഒഴിവാക്കുകയാണ് ‘മേട’യിലെ രീതി. വീടിനുള്ളിൽ വെളിച്ചം ലഭിക്കുന്നതിനായി ജനലുകളും വാതിലുകളും തുറന്നിടുന്നു.

കൂടാതെ, വീട്ടിൽ ബയോഗ്യാസ് പ്ലാന്റുമുണ്ട്. സ്വന്തം വീട്ടിലെ ഭക്ഷണാവശിഷ്ടങ്ങൾക്കൊപ്പം അയൽവാസികളുടെ ഭക്ഷണാവശിഷ്ടങ്ങളും പ്ലാന്റിൽ ഉപയോഗിക്കുന്നു.

മാലിന്യസംസ്കരണത്തിനും ഇലക്ട്രിക് വാഹനങ്ങൾക്കും പ്രാധാന്യം

ജൈവമാലിന്യങ്ങൾ കമ്പോസ്റ്റാക്കുകയും ഭക്ഷണാവശിഷ്ടങ്ങൾ ബയോഗ്യാസ് നിർമാണത്തിന് ഉപയോഗിക്കുകയും ചെയ്യുന്നതിലൂടെ മാലിന്യസംസ്കരണം കൂടുതൽ കാര്യക്ഷമമാക്കുന്നു. പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കത്തിക്കുന്നതും ഒഴിവാക്കുന്നു.

അതേസമയം, യാത്രകൾക്കായി ഇലക്ട്രിക് വാഹനങ്ങളാണ് കുടുംബം ഉപയോഗിക്കുന്നത്. സൗരോർജം, മാലിന്യസംസ്കരണം, ജൈവകൃഷി, വൈദ്യുതി ലാഭം എന്നിവ ഒരുമിച്ചുചേർന്നതാണ് വീടിന്റെ പരിസ്ഥിതി സൗഹൃദ മാതൃക.

കേരളത്തെ കാർബൺ ന്യൂട്രലാക്കുകയാണ് ലക്ഷ്യം

63കാരനായ ബാബു പറമ്പത്ത് സർക്കാർ കാർബൺ ന്യൂട്രൽ പദ്ധതികളിലും പങ്കാളിയാണ്. റിയാദിൽ ഇലക്ട്രിക്കൽ സൂപ്പർവൈസറായി ജോലി ചെയ്തിരുന്ന അദ്ദേഹം നിറവ് എന്ന പരിസ്ഥിതി സംഘടനയുടെ സ്ഥാപകനുമാണ്. വിരമിച്ച അധ്യാപിക വത്സലയാണ് ഭാര്യ. മകൻ ഋത്വിക് പറമ്പത്ത് ആർക്കിടെക്ടാണ്.

2030ഓടെ കാർബൺ ന്യൂട്രൽ ലോകമെന്ന ലക്ഷ്യത്തിലേക്കുള്ള ശ്രമങ്ങൾക്കിടെ, കൂടുതൽ വീടുകളിലേക്ക് ഇത്തരം മാതൃകകൾ വ്യാപിപ്പിച്ച് കേരളത്തെ കാർബൺ ന്യൂട്രലാക്കുകയാണ് തന്റെ ലക്ഷ്യമെന്ന് ബാബു പറമ്പത്ത് പറയുന്നു.

English Summary:

“Medha,” the home of Babu Parambath in Vengeri, Kozhikode, is presented as a model of carbon-neutral living in India. Started in 2009 on a 12-cent plot, the house combines solar power, composting, organic vegetable cultivation and biogas production. Babu says surplus solar electricity earns around ₹8,000 annually, while composting and its use in farming generate benefits worth approximately ₹1 lakh a year. The family also avoids burning waste, minimizes daytime electricity use and relies on electric vehicles. Babu aims to extend this environmentally friendly model to more homes across Kerala.