ആലപ്പുഴ: മോഷ്ടിച്ച ബൈക്കിൽ അമിതവേഗത്തിൽ സഞ്ചരിച്ച മൂന്നംഗ സംഘം അപകടത്തിൽപ്പെട്ടു. തെരുവുനായയെ ഇടിച്ച് നിയന്ത്രണംവിട്ട ബൈക്ക് എതിരെ വന്ന മറ്റൊരു ബൈക്കിലിടിച്ചുണ്ടായ അപകടത്തിൽ രണ്ട് യുവാക്കൾ മരിച്ചു. ഒരാൾ ഗുരുതരാവസ്ഥയിൽ ആലപ്പുഴ മെഡിക്കൽ കോളേജ് ആശുപത്രിയിൽ ചികിത്സയിലാണ്.
ആലപ്പുഴ–തണ്ണീർമുക്കം റോഡിൽ കൈചൂണ്ടി ജംഗ്ഷന് സമീപം ഗോൾഡൻ ചിപ്സ് കടയ്ക്ക് മുന്നിൽ വ്യാഴാഴ്ച പുലർച്ചെ മൂന്നരയോടെയായിരുന്നു അപകടം.
മോഷ്ടിച്ച ബൈക്കിൽ അപകടം; രണ്ട് മരണം
മണ്ണഞ്ചേരി സബീൽ മൻസിലിൽ നരിയിൽ സുധീറിന്റെ മകൻ മുഹമ്മദ് സബീൽ (17), മണ്ണഞ്ചേരി കുപ്പേഴം പടിഞ്ഞാറേ വീട്ടിൽ അബ്ദുൽ റഷീദിന്റെ മകൻ റിൻഷാദ് റഷീദ് (20) എന്നിവരാണ് മരിച്ചത്.
മണ്ണഞ്ചേരി കുന്നപ്പള്ളി മോഴൂപുറത്ത് ഷാനവാസിന്റെ മകൻ ഷിജാസ് (19) ആണ് ഗുരുതരാവസ്ഥയിൽ ചികിത്സയിലുള്ളത്.
തലയ്ക്ക് ഗുരുതരമായി പരിക്കേറ്റ ഷിജാസ് അബോധാവസ്ഥയിൽ വെന്റിലേറ്ററിൽ തുടരുകയാണ്. നാട്ടുകാരാണ് പരിക്കേറ്റ ഷിജാസിനെ ആശുപത്രിയിലെത്തിച്ചത്.
More Read
വീട്ടുമുറ്റത്ത് നിർത്തിയ ബൈക്ക് മോഷ്ടിച്ചു
മണ്ണഞ്ചേരി അമ്പനാകുളങ്ങര കിഴക്ക് കോളഭാഗം സൂര്യോദയം വീട്ടിൽ കെ.ബി. പ്രമോദിന്റെ വീട്ടുമുറ്റത്ത് നിർത്തിയിരുന്ന ബൈക്കാണ് സംഘം മോഷ്ടിച്ചത്.
കോട്ടയം നാട്ടകം ഗവൺമെന്റ് കോളേജിലെ ലൈബ്രറി അസിസ്റ്റന്റായ പ്രമോദ് ബുധനാഴ്ച വൈകിട്ട് ഏഴരയോടെ ബൈക്ക് പൂട്ടിവെച്ചിരുന്നു. തുടർന്ന് ഹാൻഡിൽ ലോക്ക് തകർത്ത് ബൈക്ക് മോഷ്ടിച്ച സംഘം അതുമായി കടന്നുകളയുകയായിരുന്നു.
തെരുവുനായയെ ഇടിച്ച് നിയന്ത്രണം നഷ്ടപ്പെട്ടു
ആലപ്പുഴ ഭാഗത്തേക്ക് തെറ്റായ ദിശയിൽ അമിതവേഗത്തിൽ സഞ്ചരിക്കുന്നതിനിടെയാണ് അപകടമുണ്ടായത്. അമിതവേഗത്തിലെത്തിയ ബൈക്ക് തെരുവുനായയെ ഇടിച്ചതോടെ നിയന്ത്രണം നഷ്ടപ്പെട്ടു.
തുടർന്ന് ബൈക്ക് ഏകദേശം 50 മീറ്ററോളം റോഡിലൂടെ തെന്നിനീങ്ങി എതിരെ വന്ന മറ്റൊരു ബൈക്കിൽ ഇടിക്കുകയായിരുന്നു.
മറ്റൊരു ബൈക്കിലുണ്ടായിരുന്നവർക്കും പരിക്ക്
റിജോ ജോൺസണും സുഹൃത്ത് അക്ഷയ് വിൻസന്റുമാണ് എതിരെ വന്ന മറ്റൊരു ബൈക്കിലുണ്ടായിരുന്നത്.
അപകടത്തിൽ റിജോയുടെ ഇടതുകാലിനും കൈയ്ക്കും അക്ഷയുടെ ഇരുകൈകൾക്കും ഇടതുകാലിനും പരിക്കേറ്റു. റിജോ നൽകിയ പരാതിയിൽ ആലപ്പുഴ നോർത്ത് പൊലീസ് കേസെടുത്തു.
മൃതദേഹങ്ങൾ ആശുപത്രിയിലേക്ക് മാറ്റി
നോർത്ത് പൊലീസും അഗ്നിരക്ഷാസേനയും സ്ഥലത്തെത്തി മൃതദേഹങ്ങൾ ആലപ്പുഴ മെഡിക്കൽ കോളേജ് ആശുപത്രിയിലേക്ക് മാറ്റി.
മുഹമ്മദ് സബീലിന്റെ ഖബറടക്കം വ്യാഴാഴ്ച വൈകിട്ട് മണ്ണഞ്ചേരി പടിഞ്ഞാറെ മഹല്ല് ഖബർസ്ഥാനിലും റിൻഷാദ് റഷീദിന്റെ ഖബറടക്കം മണ്ണഞ്ചേരി കിഴക്കേ മഹല്ല് ഖബർസ്ഥാനിലും നടന്നു.
മുഹമ്മദ് സബീലിന്റെ മാതാവ് സുറുമിയാണ്. സഹോദരങ്ങൾ: സഹൽ, ബിലാൽ. റിൻഷാദ് റഷീദിന്റെ മാതാവ് ഷംനയാണ്. സഹോദരങ്ങൾ: റംസി, റിദ.
English Summary
A three-member group travelling at high speed on a reportedly stolen motorcycle met with an accident near Kaichoondu Junction on the Alappuzha–Thanneermukkom Road early Thursday. The motorcycle hit a stray dog, lost control and collided with another motorcycle. Two youths, Mohammed Sabeel (17) and Rinshad Rasheed (20), died, while Shijas (19) remains in critical condition on a ventilator. Alappuzha North Police registered a case following a complaint by another injured rider.
