മസ്‌കത്ത്: ഒമാനിൽ നെയ്മീൻ നിരോധനം ഓഗസ്റ്റ് 15 മുതൽ പ്രാബല്യത്തിൽ വരും. ഒമാൻ തീരങ്ങളിൽ നെയ്മീൻ പിടിക്കുന്നതിനും വിപണനം ചെയ്യുന്നതിനുമാണ് രണ്ട് മാസത്തേക്ക് വിലക്ക് ഏർപ്പെടുത്തിയത്. ഒക്ടോബർ 15 വരെയാണ് നിയന്ത്രണം.
കടലിലെ മത്സ്യസമ്പത്ത് സംരക്ഷിക്കുന്നതിനും നെയ്മീനുകളുടെ സ്വാഭാവിക പ്രജനനം ഉറപ്പാക്കുന്നതിനുമാണ് നടപടി. ഒമാൻ കൃഷി, ജലവിഭവ മന്ത്രാലയമാണ് നിയന്ത്രണം പ്രഖ്യാപിച്ചത്.
ഒമാനിൽ നെയ്മീൻ നിരോധനം രണ്ട് മാസം
ഓഗസ്റ്റ് 15 മുതൽ ഒക്ടോബർ 15 വരെയുള്ള കാലയളവിൽ നെയ്മീൻ പിടിക്കുന്നതിനും വിൽക്കുന്നതിനും നിയന്ത്രണമുണ്ടാകും. മത്സ്യബന്ധന മേഖലയിലെ സുസ്ഥിരത ഉറപ്പാക്കുന്നതിന്റെ ഭാഗമായാണ് നടപടി.
അക്വാട്ടിക് റിസോഴ്‌സ് നിയമത്തിലെ ആർട്ടിക്കിൾ 178 പ്രകാരമാണ് മന്ത്രാലയം നിയന്ത്രണം നടപ്പാക്കുന്നത്. ഒമാന്റെ മത്സ്യബന്ധന മേഖലയിൽ ഉയർന്ന സാമ്പത്തിക മൂല്യമുള്ള മത്സ്യങ്ങളിലൊന്നാണ് നെയ്മീൻ.
നെയ്മീൻ വിൽപ്പനയ്ക്കും സൂക്ഷിപ്പിനും വിലക്ക്
നിരോധന കാലയളവിൽ മത്സ്യത്തൊഴിലാളികൾ, വിതരണക്കാർ, വ്യാപാരികൾ, കയറ്റുമതിക്കാർ, അനുബന്ധ സ്ഥാപനങ്ങൾ എന്നിവർക്ക് നെയ്മീൻ പിടിക്കാനോ വിൽക്കാനോ സൂക്ഷിക്കാനോ പാടില്ല.
More Read
അതേസമയം, നിലവിൽ നെയ്മീൻ ശേഖരമുള്ള വ്യാപാരികളും വ്യക്തികളും നിശ്ചിത സമയത്തിനുള്ളിൽ ബന്ധപ്പെട്ട മന്ത്രാലയ അധികൃതർക്ക് വിവരങ്ങൾ രജിസ്റ്റർ ചെയ്യണം.
കഴിഞ്ഞ വർഷം 19,743 ടൺ നെയ്മീൻ
കഴിഞ്ഞ വർഷം ഒമാനിൽ 19,743 ടൺ നെയ്മീൻ ഉൽപ്പാദിപ്പിച്ചതായാണ് കണക്ക്. ഇതിന്റെ വിപണി മൂല്യം 4.44 കോടി ഒമാനി റിയാലാണ്. കിലോഗ്രാമിന് ശരാശരി 2.25 റിയാൽ നിരക്കിലായിരുന്നു വിൽപ്പന.
ഒമാനിലെ ആകെ നെയ്മീൻ ഉൽപ്പാദനത്തിന്റെ 83.47 ശതമാനവും അൽ വുസ്ത, സൗത്ത് ശർഖിയ എന്നീ രണ്ട് പ്രവിശ്യകളിൽ നിന്നാണ് ലഭിക്കുന്നത്. രണ്ടിടങ്ങളിൽനിന്നും ഏകദേശം 41 ശതമാനം വീതമാണ് ഉൽപ്പാദനം.
More Read
നിയമം ലംഘിച്ചാൽ കർശന നടപടി
നെയ്മീൻ സമ്പത്ത് സംരക്ഷിക്കുന്നതിനും മത്സ്യബന്ധന മേഖലയുടെ സുസ്ഥിരത ഉറപ്പാക്കുന്നതിനുമാണ് നിയന്ത്രണം ഏർപ്പെടുത്തിയതെന്ന് മന്ത്രാലയം വ്യക്തമാക്കി.
നിരോധനം ലംഘിക്കുന്നവർക്കെതിരെ കർശനമായ നിയമനടപടികളും പിഴയും സ്വീകരിക്കുമെന്ന് അധികൃതർ മുന്നറിയിപ്പ് നൽകി. ഇതോടെ നിരോധന കാലയളവിൽ നെയ്മീനുമായി ബന്ധപ്പെട്ട വ്യാപാര പ്രവർത്തനങ്ങൾക്കും നിയന്ത്രണമുണ്ടാകും.
