തിരുവനന്തപുരം: സംസ്ഥാനത്ത് വീണ്ടും നിപ വൈറസ് ബാധ സ്ഥിരീകരിച്ച സാഹചര്യത്തിൽ നിലവിലെ ആരോഗ്യ മന്ത്രി കെ. മുരളീധരൻ മുൻപ് നടത്തിയ വിവാദ പരാമർശം സാമൂഹിക മാധ്യമങ്ങളിൽ വീണ്ടും ചർച്ചയാകുന്നു. മുൻ സർക്കാരിന്റെ കാലത്ത് നിപ റിപ്പോർട്ട് ചെയ്തപ്പോൾ ഭരണകൂടത്തെ വിമർശിച്ച് അദ്ദേഹം നടത്തിയ പ്രസംഗത്തിന്റെ ദൃശ്യങ്ങളാണ് ഇപ്പോൾ വ്യാപകമായി പ്രചരിക്കുന്നത്.
അന്ന് പ്രതിപക്ഷ നേതാവായിരുന്ന മുരളീധരൻ, നിപ വ്യാപനത്തെ ചൂണ്ടിക്കാട്ടി സർക്കാരിനെ രൂക്ഷമായി വിമർശിച്ചിരുന്നു. “എരണം കെട്ടവൻ നാട് ഭരിച്ചാൽ നാട് മുടിയും” എന്ന പരാമർശവും നിപ രോഗവ്യാപനത്തെ ഭരണപരമായ വീഴ്ചയുമായി ബന്ധപ്പെടുത്തി നടത്തിയ പ്രസംഗവുമാണ് ഇപ്പോൾ സോഷ്യൽ മീഡിയയിൽ വീണ്ടും വൈറലാകുന്നത്.
നിപ വീണ്ടും റിപ്പോർട്ട് ചെയ്ത സാഹചര്യത്തിൽ, മുരളീധരന്റെ പഴയ വാക്കുകൾ ചൂണ്ടിക്കാട്ടി നിരവധി ട്രോളുകളും വിമർശനങ്ങളും സമൂഹമാധ്യമങ്ങളിൽ പ്രത്യക്ഷപ്പെടുന്നുണ്ട്. അദ്ദേഹം പറഞ്ഞ കാര്യങ്ങൾ ഇപ്പോൾ അദ്ദേഹത്തിന്റെ തന്നെ ഭരണകാലത്ത് തിരിച്ചുവന്നുവെന്നാണ് വിമർശകർ പരിഹാസരൂപത്തിൽ പ്രതികരിക്കുന്നത്.
ഇതിനിടെ, മുൻ ആരോഗ്യമന്ത്രി വീണാ ജോർജ് വിഷയത്തിൽ പരോക്ഷ പ്രതികരണവുമായി രംഗത്തെത്തി. നിപയെക്കുറിച്ച് നിലവിലെ ആരോഗ്യ മന്ത്രി മുൻപ് നടത്തിയ പ്രസംഗം പലരും തനിക്ക് അയച്ചുതന്നതായി അവർ ഫേസ്ബുക്കിൽ കുറിച്ചു. എന്നാൽ അതിന്റെ ശരിതെറ്റുകളെക്കുറിച്ച് ഇപ്പോൾ പ്രതികരിക്കുന്നില്ലെന്നും കാലം തന്നെ അതിന് മറുപടി നൽകട്ടെയെന്നും അവർ പറഞ്ഞു.
രോഗവ്യാപനവും ആരോഗ്യ പ്രതിസന്ധികളും നേരിടുമ്പോൾ ജനങ്ങളെ ഒരുമിപ്പിച്ച് ശാസ്ത്രീയമായ പ്രതിരോധ പ്രവർത്തനങ്ങൾ ശക്തിപ്പെടുത്തുകയാണ് പ്രധാനമെന്നും അതിനായി എല്ലാവരും ഒറ്റക്കെട്ടായി നിൽക്കേണ്ടതുണ്ടെന്നും വീണാ ജോർജ് അഭിപ്രായപ്പെട്ടു.
More Read
സംസ്ഥാനത്ത് നിപ സ്ഥിരീകരിച്ചതിനെ തുടർന്ന് ആരോഗ്യ വകുപ്പ് ജാഗ്രത ശക്തമാക്കിയിരിക്കുകയാണ്. രോഗബാധിതരുടെ സമ്പർക്കപ്പട്ടിക തയ്യാറാക്കുന്നതും നിരീക്ഷണ നടപടികളും പുരോഗമിക്കുകയാണ്.
English Summary:
An old speech by Kerala Health Minister K. Muraleedharan on Nipah virus has resurfaced on social media after a fresh Nipah case was reported in the state. The speech, made when he was in the opposition, criticized the then government over the outbreak. The video is now being widely shared and discussed, while former Health Minister Veena George has responded indirectly, emphasizing the need for scientific and collective action against health crises.
